
遍知贝玛嘎波大师教言集PK162བདུད་རྩི་འཁྱིལ་བ་ཚེའི་ཆོ་ག་འཆི་མེད་ངེས་པར་སྟེར་བ་ཞེས་བྱ་བ།
16-536
༄༅། །བདུད་རྩི་འཁྱིལ་བ་ཚེའི་ཆོ་ག་འཆི་མེད་ངེས་པར་སྟེར་བ་ཞེས་བྱ་བ།
༄། །བསྙེན་པ།
༄༅།།བདུད་རྩི་འཁྱིལ་བ་ཚེའི་ཆོ་ག་འཆི་མེད་ངེས་པར་སྟེར་བ་ཞེས་བྱ་བ་བཞུགསོ།། ༄། །འགྲོ་བའི་དོན་ལ་རྟེན་ཅིང་འབྲེལ་འབྱུང་སྐུ། །ནམཁའ་ཁྱབ་ལས་རྟག་པར་ཉ་གང་བ། །རབ་དཀར་ཚེ་ཡི་བདུད་རྩི་རབ་སྦྱིན་དེས། །བདག་སོགས་ཤེལ་ཡང་འཆི་མེད་བརླན་ལྡན་མཛོད། ། འདིར་གྲུབ་པའི་རྒྱལ་མོའི་ཞལ་སྔ་ནས་ཀྱིས་བདུད་རྩི་འཁྱིལ་བ་ཚེའི་རྒྱུད་དང་། 
16-537
སྙིང་པོས་དབང་བསྐུར་བའི་གཟུངས་ལ་སོགས་པ་ལ་བརྟེན་ནས་མན་ངག་གི་གཞུང་མཛད་པ་འདི་ལ་བསྙེན་སྒྲུབ་ལས་སྦྱོར་གསུམ་ལས། དང་པོ་ལ། ཐབས་ལྔས་བསྲུང་ཞིང་རིགས་ལྔས་བསྙེན། །ཞེས་པའི་ཐབས་ལྔས་
བསྲུང་བ་ལ། ཐོག་མར་རྣལ་འབྱོར་གྱི་ཡོ་བྱད་བསགས། བདེ་བའི་སྟན་ལ་འདུག་ནས། ཕྱོགས་བཅུའི་འཇིག་རྟེན་གྱི་ཁམས་མཐའ་མུ་མེད་པ་དག་ན་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་དང་། དམ་པའི་ཆོས་དང་བྱང་ཆུབ་སེམས་དཔའི་དགེ་འདུན་ཆེན་པོ་དང་བཅས་པ་ཐམས་ཅད་ལ་ཕྱག་འཚལ་ལོ། །ཞེས་ཅི་ནུས་ཀྱི་ཕྱག་བྱས་ནས། སངས་རྒྱས་དང་བྱང་ཆུབ་སེམས་
དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས། ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་ཚེ། ལུས་དང་ངག་དང་ཡིད་ཀྱིས་སངས་རྒྱས་དང་ཆོས་དང་དགེ་
འདུན་དང་། ཕ་མ་དང་། སེམས་ཅན་གཞན་དག་ལ་སྡིག་པ་མི་དགེ་བའི་ལས་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་ཅི་མཆིས་པ་དེ་དག་ཐམས་ཅད་གཅིག་
ཏུ་བསྡོམས་ཤིང་བསྡུས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་བླ་ན་མེད་པའི་སོ་སོར་བཤགས་པས་འཆགསོ། །མི་འཆབ་བོ། །སླན་ཆད་འདི་ལྟ་བུ་མི་བགྱིད་དོ། །ལན་གསུཾ་གྱིས་བཤགས། 
16-538
སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱི་བསོད་ནམས་ཀྱི་རྗེས་སུ་ཡི་རང་བ་བླ་ན་མེད་པ་ཐུགས་སུ་ཆུད་པ་དེ་
བཞིན་དུ། བདག་མིང་འདི་ཞེས་བགྱི་བ་ཡང་སངས་རྒྱས་དང་བྱང་ཆུབ་སེམས་དཔའ་དང་རང་སངས་རྒྱས་དང་། འཕགས་པ་ཉན་ཐོས་ཐམས་ཅད་དང་འགྲོ་བ་མ་ལུས་པའི་བསོད་ནམས་ལ་རྗེས་སུ་ཡི་རང་
ངོ་ལན་གསུམ། སྐྱབས་སུ་འགྲོ་བ་འདི་བྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས། སངས་རྒྱས་ཀྱི་གདུང་རྒྱུན་མི་འཆད་པར་བགྱི་བའི་
སླད་དུ། དུས་འདི་ནས་གཟུང་སྟེ་བྱང་ཆུབ་ཀྱི་སྙིང་བོ་ལ་གནས་ཀྱི་བར་དུ་ཡང་དག་པར་རྫོགས་པའི་སས་རྒྱས་རྐང་གཉིས་ཀྱི་མཆོག་ལ་སྐྱབས་སུ་མཆི་སྟེ། ཐུགས་རྗེ་ཆེན་པོ་དང་ལྡན་པ།
ཐམས་ཅད་མཁྱེན་པ། ཐམས་ཅད་གཟིགས་པ། འཇིགས་པ་ཐམས་ཅད་དང་བྲལ་བ། སྐྱེས་བུ་ཆེན་པོ། སྐྱེས་བུ་ཁྱུ་མཆོག །སྐུ་བསམ་གྱིས་མི་ཁྱབ་པ། བླ་ན་མེད་པའི་སྐུ། ཆོས་ཀྱི་སྐུ་མངའ་བ་ལ་
སྐྱབས་སུ་མཆིའོ། །ཆོས་འདོད་ཆགས་དང་བྲལ་བའི་མཆོག་ལ་སྐྱབས་སུ་མཆི་སྟེ། བླ་ན་མེད་པ། དེ་བཞིན་གཤེགས་པ་ལ་མངའ་བ། ཞི་བ་ཆོས་ཀྱི་སྐུ། སོ་སོ་རང་རིག་པ་ལ་སྐྱབས་སུ་མཆིའོ། །
16-539
དགེ་འདུན་དུལ་བ་ཚོགས་ཀྱི་མཆོག་ལ་སྐྱབས་སུ་མཆི་སྟེ། ཕྱོགས་བཞིའི་འཕགས་པ་ཕྱིར་མི་ལྡོག་པ་བྱང་ཆུབ་སེམས་དཔའ་ཆེན་པོའི་དགེ་འདུན་ལ་སྐྱབས་སུ་མཆིའོ། །ལན་གསུམ། དེ་ནས་སེམས་བསྐྱེད་པར་བྱ་
སྟེ། དངོས་པོ་ཐམས་ཅད་དང་བྲལ་བ། །ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་རྣམ་བྲལ་བ། །ཆོས་བདག་མེད་པ་མཉམ་ཉིད་པས། །རང་སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་
རང་བཞིན་ནོ། ། ཞེས་བྱ་བའི་བྱང་ཆུབ་ཀྱི་སེམས་ཆེན་པོ་ཇི་ལྟར་སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་ཆེན་པོ་རྣམས་ཀྱིས་བསྐྱེད་པ་དེ་བཞིན་དུ། བདག་གིས་ཀྱང་། སེམས་ཅན་མ་བསྒྲལ་
བ་རྣམས་བསྒྲལ་བ་དང་། མ་གྲོལ་བ་རྣམས་དགྲོལ་བ་དང་། དབུགས་མ་ཕྱུང་བ་རྣམས་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བྱ་བའི་ཕྱིར།
དུས་འདི་ནས་གཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ་བྱང་ཆུབ་ཆེན་པོ་སེམས་བསྐྱེད་པར་བགྱིའོ། །ལན་གསུམ། བདག་གིས་བྱང་ཆུབ་ཏུ་སེམས་བསྐྱེད་བའི་དགེ་བའི་རྩ་བ་འདི་དང་། གཞན་ཡང་
བདག་གིས་བསོད་ནམས་ཅུང་ཟད་ཅི་བགྱིས་པ་དང་བགྱིད་པ་དང་། བགྱི་བར་འགྱུར་བ་དེ་དག་ཐམས་ཅད་ཕ་མ་སོགས་སེམས་ཅན་ཐམས་ཅད་ཀྱི་དོན་དུ་བླ་ན་མེད་པོ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །
16-540
དེ་ནས་རཾ་ཞེས་བརྗོད་ཅིང་། དེ་ཡོངས་སུ་གྱུར་པའི་མེའི་ཕུང་པོ་ཆེན་པོ་ཁ་དོག་རྣམ་པ་ལྔ་རབ་ཏུ་འབར་བ་བསྐལ་པ་སྲེག་པའི་མེའི་བོངས་དང་ཤུགས་ལྟ་བུ་བར་དུ་གཅོད་པ་དང་
ཕས་ཀྱིས་བརྩམས་པའི་གནོད་བ་ཐམས་ཅད་ལྷག་མ་མེད་བར་སྲེག་པ། ཅི་ལས་དེའི་དབུས་སུ་གནམ་ལྕགས་ཀྱི་འཁོར་ལོ་རྩིབས་སྟོང་མུ་ཁྱུད་དང་བཅས་པ་རྣོ་དབལ་གྱི་ངར་དང་ལྡན་པ་གཡས་སུ་
འཁོར་བ། དེའི་ལྟེ་བའི་ནང་དུ་ཁཾ་ལས་རལ་གྲིའི་འཁོར་ལོ། །གཡོན་དུ་འཁོར་བའི་འཆང་བཟུང་རྣམས་འཛོམ་པའི་དཀྱིལ་དུ། བྷྲཱུཾ་ལས་རྡོ་རྗེ་རྒྱ་གྲམ་རྭ་ཉི་ཤུ་པ་ཅིས་ཀྱང་མི་ཕྱེད་པ། དེའི་
ལྟེ་བའི་ནང་དུ་ཧཱུྃ་ལས་སྣ་ཚོགས་རྡོ་རྗེའི་ས་གཞི་རྭ་གུར་བླ་བྲེ། ཕྱི་རོལ་མདའི་དྲ་བས་བརྒྱན་པ་སྒོ་ང་ཕྱེད་དུ་བཀས་པ་ལྟ་བུའི་སྙིང་པོར། ལཾ་ལས་གཡུང་དྲུང་ཧ་ལོ་ཙ་
ཞི་མ་ཁྲོ་སྐུ་མདོག་དཀར་མོ་ཕྱག་ན་ཚེའི་བུམ་པ་འཛིན་པ་རྡོ་རྗེ་སྐྱིལ་ཀྲུང་གིས་བཞུགས་པ། ཨོཾ་རུ་རུ་སྤུ་རུ་ཛྭ་ལ་ཏིཥྛ་སིད་ངྷི་ལོ་ཙ་ནེ་སརྦ་སཱ་དྷ་ནི་སྭཱཧཱ། བརྒྱ་
རྩ་བརྒྱད་བཟླས། ཨོཾ་སྭཱ་བྷ་ཝ་བརྗོད ། དེ་བཞིན་ཉིད་ཀྱི་རང་བཞིན། དེའི་བྷ་གའི་ཀློང་ན་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའི་ཆོས་ཀྱི་ཕོ་བྲང་རིན་པོ་ཆེའི་རྒྱལ་པོ་རྣམ་པ་སྣ་ཚོགས་པའི་རྒྱུ་ལས་བྱུང་བ་གྲུ་བཞི་པ་སྒོ་བཞི་པ་རྟ་བབས་བཞིས་བརྒྱན་པ། 
16-541
ཀ་བ་བཞི་ཟུག་པ། བཀྲ་བ། ལྟ་ན་སྡུག་པ། ཤིན་ཏུ་རྣམ་པར་ཕྱེ་བ། རིན་པོ་ཆེའི་ཐེམ་སྐས་བཞི་དང་བཅས་པའི་ནང་དུ་གཞིའི་དབུས་བརྟོལ་ནས་བྱུང་བའི་རིན་པོ་ཆེའི་པདྨོ་སྡོང་པོ་
དང་། འདབ་མ་དང་། ཟེ་བ་དང་། སྙིང་པོ་ནོར་བུའི་རྒྱན་གྱིས་ངོམས་པ་མེད་པར་བརྒྱན་པ། དཔག་ཚད་དུ་མའི་ཁྱོན་ཅན་ཟླ་བ་ཆུ་ཤེལ་གྱི་གདན་བཏིང་བ། སྙིང་རྗེ་ཆེན་པོའི་རང་བཞིན། དེ་
བཞིན་གཤེགས་པ་ཐམས་ཅད་ཀྱི་འོད་ཟེར་དང་། སྔོན་གྱི་སྨོན་ལམ་གྱི་ཤུགས་ལས་ཀུན་ཏུ་སྣང་བའི་གཞི་བྷྲཱུཾ་སཾ། དབུས་སུ་བཅོམ་ལྡན་འདས་རྣམ་སྣང་ཚེ་དཔག་ཏུ་མེད་པ་དཀར་པོ་འཁོར་ལོ་བསྣམས་
པ། ཀུན་ཏུ་བཟང་མོ་སེར་པོ་གསེར་གྱི་བུམ་ཅན་ལ་འཁྱུད་པ། ལིང་ཚེའི་ཤར་དུ་ཧཱུྃ་བཾ་རྡོ་རྗེ་ཚེ་དཔག་མེད་མཐིང་ག་རྡོ་རྗེ་འཛིན་པ། སྤྱན་མ་དཀར་མོ་ཤེལ་བུམ་ཅན་དང་། ལྷོར་
ཏཱཾ་མཾ་རིན་ཆེན་ཚེ་དཔག་མེད་སེར་པོ་རིན་པོ་ཆེ་འཛིན་པ། མཱ་མ་ཀཱི་སྔོན་མོ་བཻཌཱུརྱའི་བུམ་པ་ཅན་དང་། ནུབ་ཏུ་ཧྲཱིཿབཾ་སྣང་མཐའ་ཚེ་དཔག་མེད་དམར་པོ་པདྨ་འཛིན་པ། གོས་དཀར་མོ་
དམར་མོ་པདྨ་རཱ་གའི་བུམ་པ་ཅན་དང་། བྱང་དུ་ཨཱཿཏཾ་དོན་གྲུབཚེ་དཔག་མེད་ལྗང་ཁུ་རལ་གྲི་འཛིན་པ། སྒྲོལ་མ་ལྗང་མོ་ཨིནྡྲ་ནཱི་ལའི་བུམ་པ་འཛིན་པ། ཚེའི་བདག་པོ་ལྔ་བསོད་ནམས་བརྒྱས་བསྒྲུབས་པའི་མཚན་དཔེ་བཟང་པོ་ཐམས་ཅད་ཀྱིས་འདུས་བྱས་པའི་སྐུ་ཞི་མ་ཁྲོ་ལྷའི་རྒྱལ་པོ་དབང་བསྒྱུར་བ་ཇི་ལྟ་བའི་རྒྱན་གོས་སྲིད་པ་གསུམ་ན་མཚུངས་པ་མེད་པ་ཉི་མ་འབུམ་ཕྲག་བསྡོམས་པ་ཙམ་གྱི་འོད་མངའ་བ། 
16-542
ཏིང་དེ་འཛིན་གྱི་ཕྱག་རྒྱ་མཛད་པ་རྡོ་རྗེ་སྐྱིལ་ཀྲུང་གིས་བཞུགས་པའི་ཕང་ན། ཚེ་འཛིན་མ་རྣམས་ལྷའི་བུ་མོ་གོོ་རཱི་མ་ལྟར་བརྒྱན་ཞིང་ཞི་མ་ཁྲོ་ཕྱག་གཡོན་ཡབ་ལ་འཁྱུད་པ། གཡས་
བུམ་པ་རང་རིགས་ཀྱི་ཚེའི་བདུད་རྩིས་གང་བ་བསྣམས་པ་བདྨའི་སྐྱིལ་ཀྲུང་གིས་བཅོམ་ལྡན་འདས་རྣམས་ལ་འཁྱུད་པའོ། །སྒོར་ཛཿཧཱུྃ་བཾ་ཧོཿལས་ཤར་སྒོར་ལྕགས་ཀྱུ་མ་དཀར་མོ་ལྕགས་ཀྱུ། ལྷོ་སྒོར་ཞགས་པ་
མ་སེར་མོ་ཞགས་པ། ནུབ་སྒོར་ལྕགས་སྒྲོག་མ་དམར་མོ་ལྕགས་སྒྲོག །བྱང་སྒོར་དྲིལ་བུ་མ་ལྗང་ཁ་དྲིལ་བུ་འཛིན་པ་སྒེག་མོ་གནོད་སྦྱིན་གྱི་བུད་མེད་ལྟ་བུར་ཤ་རྒྱས་པ་ཅུང་ཟད་ཁྲོ་
བ་རྒྱན་དང་གོས་ཕུན་སུམ་ཚོགས་པ་ཅན་ལྡེམ་གྱི་ཚུལ་དུ་བཞུགས་པའོ། །ཐམས་ཅད་ཀྱི་ཐུགས་ཀར་ཟླ་བའི་གའུ་ཁ་སྦྱར་གྱི་དབུས་ན་རང་རིགས་ཀྱི་ཚེའི་གཟུངས། ས་བོན་སོ་སོའི་རྣམ་པར་སྣུམ་
ལ་འདྲིལ་བ། འོད་འཚེར་བ། བསིལ་བ་འཛག་ལ་ཁད་ལྟ་བུར་བསྒོམ། མཐར་ཨོཾ་བྷྲཱུཾ་སྭཱ་ཧཱ། ཨོཾ་ཧཱུྃ་སྭཱཧཱ། ཨོཾ་ཏྲཱཾ་སྭཱ་ཧཱ། ཨོཾ་ཧྲཱིཿསྭཱ་ཧཱ།ཨོཾ་ཨཱཿསྭཱ་ཧཱ། རིགས་ལྔའི་སྔགསོ། །ཨོཾ་པུ་ཎྱེ་པུ་ཎྱེ་
མཧཱ་པུ་ཎྱེ་ཨ་པ་རི་མི་ཏ་པུ་ཎྱེ། ཨ་ཡུར་པུ་ཎྱེ་ཛྙཱ་ན་སཾ་བྷ་རོ་པ་ཙི་ཏ་སྭཱཧཱ། ཚེ་བྷྲཱུཾ། གཡུ་བྷྲཱུཾ། རྣྲི་བྷྲཱུཾ། ཨཱ་ཡུ་བྷྲཱུཾ། ཨ་ཡུ་ཁེ་སྭཱ་ཧཱ། སྔགས་འཕྲེང་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་ཐམས་ཅད་ཀྱི་སྐུའི་བྱིན་རླབས་ཨོཾ་ཡིག །
16-543
གསུང་གི་བྱིན་རླབས་ཨཱཿཡིག ། ཐུགས་ཀྱི་བྱིན་རླབས་ཧཱུྃ་ཡིག་གི་རྣམ་པ་སྟེང་ནས་ཆར་ཆེན་པོ་བབས་པ་ལྟ་བུ། འོག་ནས་ས་རླངས་འཐོན་པ་ལྟ་བུ། བར་ནས་བུ་ཡུག་འཚུབ་པ་ལྟ་བུར་བྱུང་
ནས་བདག་གི་ལུས་ངག་ཡིད་ལ་རིམ་པ་བཞིན་ཐིམ་པས་ཚེ་ཐོག་མ་མེད་པ་ནས་ད་ལྟའི་བར་དུ་བསགས་པའི་སྡིག་པ་ཐམས་ཅད་ཉི་མ་ཤར་བས་མུན་པ་བཞིན་སངས། ལུས་དེ་བཞིན་གཤེགས་
པ་ཐམས་ཅད་ཀྱི་སྐུ་རྡོ་རྗེ། ངག་གསུང་རྡོ་རྗེ། ཡིད་ཐུགས་རྡོ་རྗེར་བྱིན་གྱིས་བརློབས་པར་བསམ་ལ་བཟླའོ།། །།
༄། །སྒྲུབ་པ།
གཉིས་པ་བསྒྲུབ་བ་ལ། ཕྱི་ནང་གསང་བ་དེ་ཁོ་ན། །ཡབ་ཡུམ་བྱེ་བྲག་དག་ཏུ་
འདོད། །ཅེས་པས། ཕྱི་སྒྲུབ་ནི། མདུན་དུ་ཚོམ་བུའི་དཀྱིལ་འཁོར། དེའི་སྟེང་དུ་མཉྫིའི་ཁར། གསེར། ཚྭ། དངར། ཏིལ། དུང་། རྣྲི་བྲིས་པ་བཅུག་པའི་བུམ་པ་གོས་ཟུང་ཅན་དར་གྱིས་དཀྲིས་པ་ལྔ་། ཚེ་གཏོར་ཡང་
དེ་བཞིན་ནམ་གཉིས་ཀ་བསྡུས་ན་གཅིག །བདུད་རྩི། ཚེ་རིལ། ཕྱག་མཚན་ལྔ་བཀོད། མཆོད་པས་བསྐོར། དེ་ནས་བདག་བསྐྱེད་བཟླས་པའི་བར་བྱས། ཚོམ་བུ། བུམ་པ། གཏོར་མ། ཚེ་ཆང་། ཚེ་རིལ་རྣམས། ལཾ་ལས་
ནས་ས་བོན་བཀོད་པའི་བར། དེ་ནས་ཐུགས་ཀའི་འོད་ཟེར་གྱིས་འོག་མིན་གྱི་ཞིང་ཁམས་ནས་ཚེ་དཔག་ཏུ་མེད་པ་བསྒོམས་པ་ཇི་ལྟ་བའི་དཀྱིལ་འཁོར་མདུན་གྱི་ནམཁར་སྤྱན་དྲངས་པར་བསམས་ལ་རོལ་མོ་དང་བཅས་པའི་དབྱངས་ཀྱིས་འོག་མིན་གནས་མཆོག་དམ་པ་ཞེས། །
16-544
ཆོས་དབྱིངས་ཡུམ་གྱི་བྷ་ག་ནས། །ཚེ་བདག་རིགས་ལྔ་ཚེ་འཛིན་ཡུམ། །རྡོ་རྗེ་ཚེ་ཡི་ཕོ་ཉ་མོ། །བདག་གིས་རྩེ་གཅིག་བསྒྲུབས་པའི་ལྷ། །འཆི་མེད་ཚེ་ལ་དབང་བསྒྱུར་རྣམས། །ཚེ་བཞག་གནས་ནི་འདི་
ལགས་པས། །བྱིན་གྱིས་བརླབ་ཕྱིར་གཤེགས་སུ་གསོལ། །ཛཿཧཱུྃ་བཾ་ཧོཿདམ་ཚིག་ཡེ་ཤེས་དབྱེར་མེད་པར་གྱུར། དེ་ནས་དབང་ལྷ་ཁྲག་འཐུང་རིགས་ལྔས་ཀ་པྰ་ལའི་བདུད་རྩིས་སྤྱི་བོ་ནས་དབང་སྐུར་ཏེ་སོ་སོའི་
རིགས་ཀྱི་བདག་པོར་ཟུར་ཕུད་ཀྱི་དབུས་ན་བཞུགས་པར་གྱུར། དེ་ནས་ཨོཾ་ཨཱཿཧཱུྃ་ཞེས་པས་སྦྱངས་རྟོགས་སྦར་བའི་མཆོད་པ་རྣམས་ཀྱིས་ནམཁའི་ཁམས་ཁྱབ་པར་མོས་པས། ཧཱུྃ་དྲི་ཞིམ་གཙང་དང་ཡིད་འཕྲོག་པའི། །
མཆོད་ཡོན་ཆེ་དང་ཞབས་བསིལ་དང་། །ཞབས་བཀྲུ་འཐོར་འཐུང་སོ་རྩིའི་རྫས། །མཆོད་པ་ཀུན་གྱི་དབྱིངསུ་འབུལ། །ཨོཾ་མཧཱ་ཨརྒྷཾ། ཨཉྩ་མ་ནཱཾ། པཱ་དྱཾ། པྲོ་ཀྵ་ཎཱཾ། ཏཾ་བུ་ལེ་པྲ་ཏཱི་ཙྪ་སྭཱ་ཧཱ། ལྷ་
རྫས་མེ་ཏོག་སྤོས་ཀྱི་མཆོག།།སྣང་གསལ་བྱུག་པ་ཞལ་ཟས་དང་། །སྙན་པའི་རོལ་མོ་རྣམས་ཀྱི་སྤྲིན། །ནམཁའི་མཛོད་ལས་ཕྱུང་སྟེ་འབུལ། །ཨོཾ་པུཥྤེ། དྷཱུ་པེ། ཨཱ་ལོ་ཀེ། གན་དྷེ། ནཻ་ཝི་དྱ། ཤཔྟ་པྲ་
ཏཱི་ཙྪ་སྭཱ་ཧཱ། དགའ་བ་བསམ་ཡས་བསྐྱེད་པ་ཡིས། །དཀྱིལ་འཁོར་ཀུན་གྱི་རྩེད་འཇོ་མཁན། །གཟུགས་སྒྲ་དྲི་རོ་རེག་བྱ་མ། །འདོད་པའི་དབྱིངས་ཀྱིས་མཆོད་པར་བགྱི། །རཱུ་པ། ཤཔྟ། གན་དྷེ། རཱ་ས། སྤརྴ་པྲ་ཏཱི་ཙྪ་སྭཱ་ཧཱ། 
16-545
སྒྲོན་མ་ལྔ་དང་བདུད་རྩི་ལྔ། མྱོས་བྱེད་རྣམ་པ་མང་པོའི་རིགས། །མིང་མེད་མཐེ་བོང་རྩེ་སྦྱར་བས། །དངོས་གྲུབ་འདོད་པ་འབུལ་བར་བྱ། །ཨོཾ་སརྦ་པཉྩ་ཨ་མྲྀ་ཏ་པྲ་ཏཱི་ཙྪ་སྭཱ་ཧཱ། རྣམ་
བཅས་རྣམ་པ་མེད་པ་ཞེས། །གཉིས་མེད་གཉིས་སུ་བྱར་མེད་པ། །ཤེས་རབ་ཕ་རོལ་ཕྱིན་ཡུམ་ལ། །མཉམ་པོར་སྦྱོར་བའི་མཆོད་པ་བགྱི། །ཞེས་མཆོད་པ་བཞི་ཕུལ་ནས། །བཅོམ་ལྡན་མགོན་པོ་ཚེ་དཔག་མེད། །
མཁའ་དང་མཉམ་པའི་སྐུ་མངའ་བ། །སྐུ་མཆོག་རྣམ་པར་དག་པ་ཡི། །རྡོ་རྗེའི་སྐུ་ལ་ཕྱག་འཚལ་ལོ། །གསུང་མཆོག་རྣམ་པར་དག་པའི་གསུང་། །གསུང་མཆོག་དམ་པ་བརྗོད་དང་བྲལ། །ཡི་གེ་མེད་ཅིང་སྒྲ་
སྤངས་པ། །སྤྲོས་མེད་གསུང་ལ་ཕྱག་འཚལ་བསྟོད། །ཐུགས་མཆོག་རྣམ་པར་དག་པའི་ཐུགས། །ཐུགས་མཆོག་རྣམ་པར་རྟོག་པ་སྤངས། །ཆགས་མེད་ཡེ་ཤེས་མཁྱེན་པ་སྟེ། །སྟོང་ཉིད་ཐུགས་ལ་ཕྱག་འཚལ་བསྟོད། །དེ་ནས་མདུན་
བསྐྱེད་ཀྱི་ཚེའི་བདག་པོ་རྣམས་བསྐུལ་བ། །ཧཱུྃ། བཅོམ་ལྡན་རྣམ་སྣང་ཚེ་དཔག་མེད། །ཕྱག་རྒྱ་འཁོར་ལོ་ལ་སོགས་པས། །ཕྱོགས་བཅུ་ནམཁའི་བདུད་བཅོམ་ནས། །སྣང་མཛད་ཚེ་སྩོལ་སྲོག་སྐྱོབས་ཤིག །ཨོཾ་བྷྲཱུཾ་བཛྲ་ཨཱ་
ཡུ་ཥེ་སྭཱ་ཧཱ། བཅོམ་ལྡན་རྡོ་རྗེ་ཚེ་དཔག་མེད། །ཕྱག་རྒྱ་རྡོ་རྗེ་ལ་སོགས་པས།྾།རྡོ་རྗེ་ཚེ་སྩོལ། ཧཱུྃ་བྷྲཱུཾ། བཅོམ་ལྡན་རིན་འབྱུང་ཚེ་དཔག་མེད། །ཕྱག་རྒྱ་རིན་ཆེན་འབར་བ་སོགས།྾། 
16-546
རིན་ཆེན། སྭ་བྷྲཱུཾ། བཅོམ་ལྡན་སྣང་མཐའ་ཚེ་དཔག་མེད། །ཕྱག་རྒྱ་པདྨལ་སོགས་པས།྾།སྣང་མཐའི། ཧྲཱིཿབྷྲཱུཾ། བཅོམ་ལྡན་དོན་གྲུབ་ཚེ་དཔག་མེད། །ཕྱག་རྒྱ་རྒྱ་གྲམ་ལ་སོགས་པས།྾།དོན་ཡོད། ཨཱཿབྷྲཱུཾ། བཛྲ། བསྐུལ་
བས་ཚེ་བདག་རིགས་ལྔས་སྐུ་ལས་སྤྲུལ་བ་དཔག་ཏུ་མེད་པ་བཀྱེ་ནས་བདུད་དང་བར་ཆོད་ཐམས་ཅད་ཚར་བཅད་དེ་སངས་རྒྱས་རྣམས་ཀྱི་བྱིན་རླབས་བསྡུས་ཏེ་ཚེ་འཛིན་མ་རྣམས་ཀྱི་བུམ་པ་སོ་
སོའི་ནང་དུ་རྣྲི་ལ་བསྟིམ་སྔགས་ལྔ་པོ་བརྒྱ་རྩ་བརྒྱད་བཟླས། ཡང་ཚེའི་ཕོ་ཉ་རྣམས་བསྐུལ་བ། ཤར་གྱི་ཕྱོགས་ནས་ཚེ་འགུགས་པ། རྡོ་རྗེ་ལྷ་མོ་ལྕགས་ཀྱུ་མ། །སྐུ་མདོག་དཀར་ལ་འོད་ཟེར་
འཕྲོ། །ཕྱག་མཚན་རྡོ་རྗེའི་ལྕགས་ཀྱུ་སྟེ། །དྲི་ཟའི་ལག་ནས་ཚེ་ཁུག་ཅིག །ལྷོ་ཡི་ཕྱོགས་ནས། རིན་ཆེན་ལྷ་མོ་ཞགས་པ་མ། །མཐིང་ཁ། ཕྱག་མཚན་དོན་ཡོད་ཞགས་པ་སྟེ། །གཤིན་རྗེའི། ནུབ་ཀྱི་ཕྱོགས།
ཆོས་ཀྱི་ལྷ་མོ་ལྕགས་སྒྲོག་མ། །དམར་ལ། ཕྱག་མཚན་སྡོམ་བྱེད་ལྕགས་སྒྲོག་སྟེ། །ཀླུ་གདོན། བྱང་གི་ཕྱོགས་ནས་ཚེ་འགུགས་པ། །ལས་ཀྱི་ལྷ་མོ་དྲིལ་སྒྲོག་མ། །ལྗང་ལ། ཕྱག་མཚན་མཉེ་བྱེད་དྲིལ་བུ་
སྟེ། །གནོད་སྦྱིན། ཚེ་བྷྲཱུཾ། གཡུ་བྷྲཱུཾ་ཨཱ་ཡུ་བྷྲཱུཾ། བཛྲ་ཨཱ་ཡུ་ཥེ་བྷྲཱུཾ་སྭཱཧཱ། བརྒྱ་རྩ་བརྒྱད་བཟླས། ཚེའི་ཕོ་ཉ་བཞིས་བདག་གི་ཚེ་ཉམས་ཤིང་ཕྲོགས་པ་ཐམས་ཅད་བཀུག་ནས་ཚེ་འཛིན་མའི་བུམ་པའི་ནང་དུ་བསྟིམ་མོ། །
16-547
དེ་ནས་ཚེ་འཛིན་མ་རྣམས་བསྐུལ་པ། ཚེ་སྲིངས་ལ་གནས་པ་རྣམས། །སངས་རྒྱས་སྤྱན་གྱིས་འདིར་སྩོལ་ཅིག །ཆུ་ལ། མཱ་མ་ཀཱི། མེ་ལ། གོས་དཀར། རླུང་ལ། སྒྲོལ་མ། མཁའ་ལ། ཀུན་བཟང་། ས་ཡི་
སྙིང་པོ་གསེར་ལ་བསྡུ། གསེར་ལ་ཚེ་ཡི་རྟེན་མཆིས་སོ། །ཆུ་ཡི་སྙིང་པོ་ཚྭ་ལ་བསྡུ། ཚྭ་ལ། ཤིང་ཐོག་སྙིང་པོ་མངར། མངར་ལ། འབྲུ་ཐོག་སྙིང་པོ་ཏིལ་ལ། རུས་པའི་སྙིང་པོ་དུང་ལ།
དུང་ལ། སྲོག་གི་སྙིང་པོ་རྣྲི་ལ། རྣྲི་ལ་ཚེ་འཛིན་མ་རྣམས་ཀྱི་བུམ་ནང་དུ་རྣྲི་འོད་དུ་འབར་བ་དེ་ལ་འབྱུང་བ་ལྔའི་ཚེའི་བཅུད་ཐམས་ཅད་བསྡུས་ནས་བསྟིམ་པས་བཀྲག་དང་ལྡན་པར་
གྱུར། ༀ་རུ་རུ་སྔར་བཞིན་དང་། ཨོཾ་ཤངྐ་རེ་ཤཱནྟིཾ་ཀ་རེ་མུ་ཊྚི་ནི་གྷཱ་ཏ་ཡ་གྷཱ་ཏ་ཡ་གྷུ་ཊ་ཊི་ནི་སྭཱཧཱ། ཨོཾ་ཀ་ཊེ་བི་ཀ་ཊེ་ནི་ཀ་ཊེ་ནྐ་ཊེ་སྭཱཧཱ། ཨོཾ་
ཏཱ་རེ་ཏུ་ཏྟཱ་རེ་ཏུ་རེ་སྭཱཧཱ། ཨོཾ་སརྦ་ཀཾ་སྟྭཾ་དེ་བྱེ་རི། མ་ཧཱ་རེ་དེ་ཤེ་ཤེ་རི་ཡེ་སྭཱ་ཧཱ། ཚེ་བྷྲཱུཾ་སོགས་བརྒྱ་རྩ་དུ་བརྒྱད་བཟླས། དེ་ནས་བདག་བསྐྱེད་ཀྱི་གཙོ་འཁོར་
གྱི་ཐུགས་ཀ་ནས་ཡང་དག་པའི་ཡེ་ཤེས་ཀྱི་ངོ་བོ་ཚེའི་རང་བཞིན་ས་བོན་དུ་གནས་པ་རྣམས་ལས་འོད་འཕྲོས་མདུན་བསྐྱེད་ཀྱི་ལྷ་ཚོགས་རྣམས་ཀྱི་ཐུགས་ཀར་ཕོག །དེ་ལས་འཕྲོས་པའི་འོད་ཟེར་གྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བའི་དཀྱིལ་འཁོར་ན་དེ་ཁོ་ན་ཉིད་ཀྱི་སེམས་བདེ་བ་ཆེན་པོར་གནས་པ་ཚུར་བསྡུས་ནས་ཚེ་འཛིན་མ་རྣམས་ཀྱི་བུམ་ནང་དུ་ཐིམ་པས་འཆི་མེད་ཚེའི་རང་བཞིན་གྱི་བདུད་རྩི་དེ་ཆིལ་ལི་ལི་ཁོལ་བར་བསམས་ལ། 
16-548
ཨོཾ་བྷྲཱུཾ་སྭཱ་ཧཱ་སོཌ་དང་། ཨོཾ་པུ་ཎྱེ་པུ་ཎྱེ་ཨ་པ་རི་མི་ཏ་ཨཱ་ཡུར་པུ་ཎྱེ་ཛྙཱ་ན་སཾ་བྷ་རོ་པ་ཙ་ཡ་ཀ་རི་ཎེ་སྭཱ་ཧཱ། ཨོཾ་ཨ་མི་ཏེ། ཨ་མི་ཏ།
ཨུ་ཏ་བྷ་ཝེ། ཨ་མི་ཏ། བི་ཀྲཱ་ནྟེ་ཨ་མི་ཏ། བི་ཀྲཱ་ནྟེ་ག་མི་ནི་སརྦ་ཀརྨ་ཀླེ་ཤཀྵ་ཡཾ་ཀ་རི་སྭཱ་ཧཱ། ཨོཾ་རཏྣེ་རཏྣེ་མ་ཧཱ་རཏྣེ་རཏྣ་སཾ་བྷ་ཝེ། རཏྣ་ཀི་
ར་ཎེ། རཏྣ་མཱ་ལེ། ཤོདྷ་ཡ་སརྦ་པཱ་པཾ་ཧཱུྃ་ཕཊཿ། ཛཿཧཱུྃ་བཾ་ཧོཿ ཨོཾ་བྷ་ག་ཝན་ཨེ་ཧྱེ་ཧི། ས་མ་ཡ་སྟྭཾ། ཨོཾ་བཛྲ་ས་མ་ཡ་ཧཱུྃ། ཨོཾ་པྲ་ཏཱི་བཛྲ་ཧཱུྃ། ཨོཾ་ཨ་མོ་
གྷ། ཨ་པྲ་ཏི་ཧ་ཏ། སརྦ་ཨཱ་ཝ་ར་ཎ་ནི་ནཱ་ཤ་ན་ཧ་ར་ཧ་ར་ཧཱུྃ་ཕཊ། དེའི་མཐར་སརྦ་ཀ་སྟྭཾ་རི་དང་། ཨོཾ་རུ་རུ་སྤུ་རུ་སོགས་བཞི། ཤམ་བུ་དང་བཅས་པ་
གདགས་ལ་བཟླས་སོ། ། ཐུན་མཚམས་སུ་གཏོར་མ་ཨོཾ་ཨཱཿཧཱུྃ་གིས་བྱིན་གྱིས་བརླབས། ཨོཾ་ཨ་ཀཱ་རོའི་སྔགས་ཀྱིས་ཕུལ་ལ། འདོད་པའི་དོན་གསོལ། མཆོད་པ་བསྡུས་པ་དང་བསྟོད་པ་བྱས། མདུན་བསྐྱེད་དེ་ཁར་བཞུགསུ་
གསོལ། བདག་བསྐྱེད་བསྡུས་ནས་རྗེས་སྤྱོད་ལ་འཇུག །སྒྲུབ་པ་གྲོགས་དང་བཅས་ན་གཅིག་གི་བཟླས་པ་རན་པ་ནས་ཅིག་ཤོས་ཀྱིས་ཆོ་ག་བཙུགས། བཟླས་པ་ཟིན་པ་དང་དེའི་བཟླས་པ་འགོ་ཚུགས་པ་བྱས་ནས་གསུང་མི་འཆག་ཏུ་བྱས་པས་བདུད་རྩི་ཁོལ་ཞིང་ཚེ་རྫས་འབར་བ་དང་བདུད་རྩིར་ཞུ་བ་འབྱུང་། 
16-549
དེ་ནས་ལས་ལ་སྦྱར་རོ། །ནང་སྒྲུབ་ནི། ཇི་སྐད་བཤད་པ་ཐམས་ཅད་ཡིད་ཀྱིས་བསྒོམ་པ་ཁོ་ན་སྟེ། ཕྱི་རོལ་གྱི་རྫས་མེད་པར་རོ། །དེའི་ཚེ་བཟླས་པ་རྫོགས་པ་དང་ལས་ལ་སྦྱར་རོ། །
གསང་སྒྲུབ་ནི། རང་སེམས་ལས་གཞན་ལོགས་སུ་མེད་པར་ངེས་ནས། བདག་ཉིད་ལྷར་བསྒྲུབས་པའི་བཟླས་པའི་མཐར། རྟེན་ཁང་པ། ཚེའི་ཕོ་ཉ་མོ་རྣམས་རིགས་ལྔ་ཡབ་ཡུམ་ལ་ཐིམ། དེ་གཙོ་བོ། ཚེའི་བདག་
པོ་རྣམ་སྣང་དང་ཚེ་འཛིན་མ། ཀུན་ཏུ་བཟང་མོ་སྙོམས་པར་ཞུགས་པས་རང་བཞིན་གྱིས་གྲུབ་པའི་དེ་བཞིན་གཤེགས་པ་ཕུང་པོ་ཁམས་སྐྱེ་མཆེད་ཀྱི་རྣམ་པར་སྣང་བ་རྣམས་ཐིག་ལེ་དཀར་དམར་དུ་
ཞུ་བ་ཁ་སྦྱར་བའི་དབུས་སུ་སེམས་ཚུད་པར་བསྒོམས་ལ་སྟོང་པ་ཉིད་འོད་གསལ་དུ་གཞུག །དེ་ལ་མི་གནས་པར་ལྡང་བ་ན། ཡང་དཀར་པོ་ལས་ཡབ། དམར་པོ་ལས་ཡུམ། དེ་གཉིས་ལས་འཁོར་
རྟེན་དང་བཅས་པ་བྱེ་སྟེ་དཀྱིལ་འཁོར་དུ་ཁྲ་ལཾ་མེ་ལངས་པ་སླར་བཟླས་བརྗོད། ཡང་སྔར་གྱི་གོ་རིམ་བཞིན་དུ་བསྡུས་ཏེ་སྟོང་ཉིད་ལ་གཞུག་གོ །ཐུན་གྱི་མཐར་ཚེ་དཔག་མེད་ཡབ་ཡུམ་དུ་
ལངས་ནས་དགེ་བ་བསྡོས་ཏེ་རྗེས་སྤྱོད་ལ་འཇུག །དེ་ཁོ་ན་ཉིད་དུ་བསྒྲུབ་པ་ནི། ཡབ་ཡུམ་བྱེ་བྲག་དག་ཏུ་འདོད། །ཅེས་པས། གསང་བའི་སྒྲུབ་པ་ཚུན་བྱས། དེ་ནས་དཀྱིལ་འཁོར་གྱི་ལྷར་ལངས་ནས་གཙོ་བོ་ཡབ་ཡུམ་སྙོམས་པར་ཞུགས་པའི་གཙོ་བོའི་རྡོ་རྗེ་ནས་བྱང་ཆུབ་ཀྱི་སེམས་ཆ་དགུ་ཡུམ་གྱི་བྷ་གར་ལྷུང་། 
16-550
དེའི་དམར་པོ་དང་འདྲེས་པ་ལས་སྐད་ཅིག་གིས་ཚེ་དཔག་མེད་ལྔ་ཡུམ་ཚེའི་ཕོ་ཉ་དད་བཅས་པར་གྲུབ། དེ་གྲུབ་པས་རྟེན་གཞལ་ཡས་ཁང་དེའི་ལོངས་སྤྱོད་དུ་འགྲུབ་པས་ཁྲ་ཧྲཾ་མེར་གསལ་བར་
བསྒོམ། དེ་ནས་དེ་དག་ལས་ཀྱང་དེ་ལྟ་བུ་སྤྲོས། ཕྱིར་འཐོན་ནས་རིམ་པ་དེ་ལྟ་བུས་དེ་དག་ལས་འཕྲོས་པས་ཁམས་གསུམ་པོ་ཐམས་ཅད་བསམ་གྱིས་མི་ཁྱབ་པའི་དཀྱིལ་འཁོར་གྱི་འཁོར་ལོའི་རང་
བཞིན་དུ་གྱུར་པར་བསམ་མོ།། །།
༄། །ལས་སྦྱོར།
གསུམ་པ་ལས་སྦྱོར་ནི། ཚེ་རྫས་ཁོལ་བ་དང་ལུད་པ་དང་འོད་དུ་འབར་བ་དང་མ་རྙིངས་པ་བཀྲག་ཏུ་འཚེར་བ་ལ་སོགས་པ་བྱུང་ན། རང་ངམ་གཞན་རྗེས་
སུ་འཛིན་པ་ལ། ཚེ་དཔག་མེད་ཡབ་ཡུམ་དུ་བསྐྱེད། བདེ་གཤེགས་ལྔ་ཡང་ཚེ་དཔག་མེད། ཕྱོགས་བཅུའི་འཇིག་རྟེན་ཁམས་བསྐོར་ཏེ། །བདུད་དང་མུ་སྟེགས་ཀུན་བཅོམ་ནས། །དཔལ་ཚེ་གཟི་བརྗིད་འཕེལ་བར་མཛོད། །ཅེས་
ཚེའི་བདག་པོ་རྣམས་ལ་གསོལ་བ་བཏབ་པས། བཅོམ་ལྡན་རྣམ་སྣང་ཚེ་དཔག་མེད་སོགས་བརྗོད། སྤྲོ་དུས་ཚེའི་བགེགས་བསལ། དེ་ནས་མདའ་དར་ལྔ་གཡོབ་ཅིང་ཚེའི་ཕོ་ཉ་བཞི་བསྐུལ་བའི་ཚེ་འགུགས། དེ་ནས་
ཚེ་འཛིན་མ་རྣམས་ལ། སྐུ་མདོག་དངས་ལ་འོད་ཟེར་འབར། ། ཕྱག་ན་བདུད་རྩིའི་བུམ་པ་བསྣམས། །ཚེ་དབང་མོ་ཡི་ཚེ་དང་ནི། །དཔལ་དང་གཟི་བརྗིད་འཕེལ་བར་མཛོད། །ཞེས་གསོལ་བ་བཏབ་པས། ཡབ་རྣམས་ཀྱིས་དགོངས་པ་མཛད། 
16-551
ཚེ་འཛིན་མ་རྣམས་རིམ་པ་བཞིན་བཞེངས་པའི་དང་པོ་སྤྱན་མས། རང་གི་ཕྱག་གི་ཤེལ་བུམ་བདུད་རྩི་སྐྱ་ཆིལ་ལི་ལི་སྤྱི་བོ་ཚངས་པའི་བུ་ག་ནས་བླུགས་བར་བསམ་ཞིང་། ཤར་གྱི་ཕྱོགས་ནས་
ཚེ་འཛིན་མ། །རྡོ་རྗེ་ཡུམ་ཆེན་སངས་རྒྱས་སྤྱན། །རིན་ཆེན་ཤེལ་གྱི་བུམ་པ་ནི། །རྡོ་རྗེ་ཚེ་ཡིས་བཀང་ནས་ཀྱང་། །སྤྱི་བོའི་གཙུག་ནས་དབང་བསྐུར་ཞིང་། །ཚེ་དབང་ཐམས་ཅད་བརྟན་པར་མཛོད། །ཨོཾ་རུ་
སོགས། ཚེའི་བདུད་རྩི་ལུས་ལ་ཞུགས་པས་སའི་ཁམས་དང་རོ་གཅིག་ཏུ་འདྲེས་ཏེ། ལུས་སྲ་ཞིང་བརྟན་པ་གང་གིས་ཀྱང་གཞོམ་གཞིག་མི་ནུས་པ་རྡོ་རྗེ་ལྟ་བུར་གྱུར་ཅིག་བྱས། དེ་བཞིན་ལྷོ་ཡི་
ཕྱོགས་ནས༴ རིན་ཆེན་ཡུམ་ཆེན་མཱ་མ་ཀཱི། །རིན་ཆེན་བཻཌཱུརྱའི་བུམ་པ། །རིན་ཆེན༴ ། སྤྱི༴ །ཚེ་དབང་ཐམས་ཅད་དར་བར་མཛོད། །ཨོཾ་ཤང་། ཆུའི་ཁམས་ལུས་སྣུམ་བག་མཉེན་ལྕུག་ཕུན་སུམ་ཚོགས་པ་བྲི་བ་མེད་
པ་རྒྱ་མཚོ་ལྟ་བུར་གྱུར་ཅིག །ནུབ་ཀྱི། པདྨ་ཡུམ་ཆེན་ན་བཟའ་དཀར། །རིན་ཆེན་རཱ་གའི༴ པདྨ། སྤྱི༴ །ཚེ་དབང་ཐམས་ཅད་རྒྱས་པར་མཛོད། །ཨོཾ་ཀ་ཊེ། མེའི་ཁམས་ལུས་བཀྲག་མདངས་གཟི་བརྗིད་ཕུན་སུམ་
ཚོགས་པ་འབར་བས། མི་ནུབ་པ་རྒྱལ་མཚན་ལྟ་བུར་མཐོ་བར་གྱུར་ཅིག །བྱང་། ལས་རབ་ཡུམ་ནི་དམ་ཚིག་སྒྲོལ། །རིན་ཆེན་ཨིནྡྲའི༴ །དོན་གྲུབ་ཚེ་ཡིས༴ སྤྱི༴ །ཚེ་དབང་ཐམས་ཅད་འཕེལ་བར་མཛོད། །ཨོཾ་ཏཱ་རེ། 
16-552
རླུང་གིས་ལུས་སྟོབས་དང་ཡང་བ་དང་། ཁྱབ་པ་ལ་སོགས་པའི་འདོད་དགུར་བསྒྱུར་བ་ཡིད་བཞིན་གྱི་ནོར་བུ་ལྟ་བུར་གྱུར་ཅིག །ནམཁའི་དབྱིངས་ནས། དེ་བཞིན་ཡུམ་ནི་ཀུན་ཏུ་བཟང་། །རིན་ཆེན་གསེར་གྱི་
བུམ་པ་ནི། །རྣམ་སྣང་ཚེ་ཡིས༴ སྤྱི་བོའི༴ །ཚེ་དབང་ཐམས་ཅད་བརྟན་པར་མཛོད། ཨོཾ་སརྦ་ཀ་སྟྭཾ། ནམཁའི་ཁམས་ལུས་རྒ་བ་དང་འཆི་བ་མེད་པ་བཅུ་དྲུག་ཆའི་གང་བ་ལས་འགྱུར་བ་མེད་པ་
གཡུང་དྲུང་ལྟ་བུར་གྱུར་ཅིག །དེ་ནས་སངས་རྒྱས་དང་བྱང་ཆུབ་སེམས་དཔའི་དགེ་འདུན་ཐམས་ཅད་ཀྱི་སྐུ་གསུང་ཐུགས་ཡོན་ཏན་ནུས་པ་ཐམས་ཅད་འོད་ཟེར་གྱི་རྣམ་པར་ལུས་ངག་ཡིད་ཡོན་ཏན་འཕྲིན་
ལས་ལ་ཞུགས་པས་གཉིསུ་འཛིན་པ་ཐམས་ཅད་ཞིག་སྟེ་ཆོས་ཀྱི་དབྱིངསུ་ཐིམ་པར་བསམ་མཉམ་པར་བཞག །ཕྱག་རྒྱ་རྣམས་གནས་ལྔར་རེག་པས། ཆོས་ཀྱི་དབྱིངསུ་ཚེ་སྦས་པས། །སྣང་སྲིད་ལྷ་འདྲེ་གར་ལངས་ཀྱང་། །
དེ་ལ་གཟུང་ཞིང་བཅིང་དུ་མེད། །ཕྱག་རྒྱ་བཅུ་ཡི་རྒྱས་འདེབས་སོ། ། དང་པོ་ཆོས་ཀྱི་དབྱིངས་ཀྱི་རྒྱ། །གཉིས་པ་ཐབས་དང་ཤེས་རབ་རྒྱ། །གསུམ་པ་སྐུ་གསུང་ཐུགས་ཀྱི་རྒྱ། །བཞི་བ་ཡེ་ཤེས་བཞི་
ཡི་རྒྱ། །ལྔ་པ་རིགས་ལྔ་སངས་རྒྱས་རྒྱ། །དྲུག་པ་དཔལ་ཆེན་རྟ་མགྲིན་རྒྱ། །བདུན་པ་གསེར་གྱི་ཟོར་བའི་རྒྱ། །བརྒྱད་པ་སེམས་དཔའ་བརྒྱད་ཀྱི་རྒྱ། །དགུ་པ་ཐེག་པ་རིམ་དགུའི་རྒྱ།།བཅུ་པ་དཔལ་ཆེན་ཁྲོ་བཅུའི་རྒྱ། །
16-553
ཕྱག་རྒྱ་བཅུ་ཡི་རྒྱས་བཏབ་བོ། །ཞེས་ཚེ་སྦས། སླར་དེ་གང་གིས་ཀྱང་མི་ཤིགས་པ་སངས་རྒྱས་ཀྱི་མཛད་པ་བྱེད་པའི་ནུས་ལྡན་དུ་བྱ་བའི་ཕྱིར་དབང་བསྐུར་བར་བྱ་སྟེ། བུམ་པ་གནས་ལྔར་
བཀོད། ཚེ་ཆང་ཚེ་རིལ་སྦྱིན། སྤྱི་གཙུག་ཟླ་བའི་དཀྱིལ་འཁོར་དུ། །བཅོམ་ལྡན་རྣམ་པར་སྣང་མཛད་དང་། །དཀྱིལ་འཁོར་བཛིན་པའི་ཀུན་ཏུ་བཟང་། །དེ་ཡི་ཐུགས་རྗེའི་བྱིན་རླབས་ཀྱིས། །ཚེ་འདི་རབ་ཏུ་བརྟན་པར་
མཛོད། །བུདྡྷ་ཀ་ལ་ཤ་ཨབྷི་ཥིཉྩ་ཨོཾ། བུམ་ནང་གི་ཚེ་རྟེན་རྣྲི་སྤྱི་བོར་ཞུགས། ཨོཾ་དུ་སོང་། དེ་བཞིན་ལྷག་མ་བཞི་ལའང་འགྲེའོ། །དཔྲལ་བ་ཟླ་གམ་དཀྱིལ་འཁོར་དུ། །རྡོ་རྗེ་སེམས་དཔའ་དང་། སངས་
རྒྱས་སྤྱན༴ །བརྟས་པར་མཛོད༴ །བཛྲ་ཀ་ལ་ཤ་ཨ་བྷི་ཥིཉྩ་ཧཱུྃ། ལྕེ་ནི་པདྨ་འདབ་བརྒྱད་ལ། རིན་ཆེན་འབྱུང་ལྡན་དང་། མཱ་མ་ཀཱི།྾།དར་བར། རཏྣ་ཀ་ལ་ཤ་ཨབྷི་ཥིཉྩ་ཏྲཱཾ། ལྟེ་བ་གཞལ་
ཡས་དཀྱིལ་འཁོར་དུ། །སྣང་བ་མཐའ་ཡས་དང་། ན་བཟའ་དཀར༴ །རྒྱས་པར། པདྨ་ཀ་ལ་ཤ་ཨ་བྷི་ཥིཉྩ་ཧྲཱིཿ རྐང་མཐིལ་ནེ་ལེ་གྲུ་གསུམ་ལ། །བཅོམ་ལྡན་དོན་ཡོད་གྲུབ་པ་དང་། དམ་ཚིག་སྒྲོལ། དེ།
འཕེལ་བར་མཛོད། ཀརྨ་ཀ་ལ་ཤ་ཨ་བྷི་ཥིཉྩ་ཨ། དེ་ནས་ཧཱུྃ་ཞེས་བརྗོད་པས་སློབ་མའི་ལུས་དེ་ཡོངསུ་གྱུར་པའི་གསེར་གྱི་རྡོ་རྗེ་རྩེ་ལྔ་པ་ཤིན་ཏུ་ཆེ་ཞིང་སྲ་བ་ཅིས་ཀྱང་མི་ཤིགས་པ། 
16-554
ཅིས་ཀྱང་མི་ཆོད་པ། ཅིས་ཀྱང་འཇོམས་པར་མི་ནུས་པ། བརྟན་པ། སྲ་བ། མཁྲེགས་པ། ཉི་མ་འབུམ་གྱི་གཟི་བརྗིད་དང་མཉམ་པ་ཞིག་ཏུ་གྱུར། ཧཱུྃ། བསྐྱེད་པས་མི་ནུབ་ཚེ་ཡི་རང་བཞིན་ནི། །
སྤྲོས་པས་ཁམས་གསུམ་ཐམས་ཅད་བཀྲག་དང་ལྡན། །བསྡུས་པས་སྲིད་པ་གསུམ་པོའི་གཟི་མདངས་འཕྲོག །བཅིངས་པས་འདུ་འབྲལ་མེད་དེ་ལུ་གུ་རྒྱུད། བསྟན་པས་མི་གཡོ་རི་རིབ་ལྷུན་པོ་ལྟར། །རྡོ་རྗེ་ཚེ་ཡི་
དངོས་གྲུབ་ཐོབ་པར་ཤོག །སྤྱི་བོ། མགྲིན་པ། སྙིང་ག་གསུམ་དུ་རྡོ་རྗེས་རྒྱས་གདབ་ལན་གསུམ་བརྗོད། མེ་ཏོག་ཐོགས། ཨོཾ། ཡོན་ཏན་རྒྱས་པ་སྐུ་མདོག་གསེར་དང་མཚུངས། །ཤེས་རབ་ཆེན་པོའི་རྟགས་སུ་རལ་
གྲི་བསྣམས། །འཕགས་པ་འཇམ་དཔལ་བཀྲ་ཤིས་གང་ཡིན་པའི། །བཀྲ་ཤིས་དམ་པས་དེང་འདིར་བདེ་ལེགས་ཤོག །སྤྱི་བོར་འཐོར། ཐུགས་རྗེས་བསིལ་མཛད་སྐུ་མདོག་ཟླ་ཉ་འདྲ། །སྐྱོན་གྱིས་མ་གོས་ཕྱག་ན་པདྨ་བསྣམས། །
སྤྱན་རས་གཟིགས་ཀྱི༴ །མགྲིན་པར། འགྱུར་བ་མེད་པ་སྐུ་མདོག་མཐིང་ནག་སྟེ། །མཐུ་སྟོབས་ཆེར་སྟོན་ཕྱག་ན་རྡོ་རྗེ་བསྣམས། གསང་བའི་བདག་པོའི། སྙིང་གར་འཐོར། གཞན་དོན་གྱི་ཚེ་ཚོགས་ལས་ཚེ་དཔག་མེད་
ཁྲོ་བོའི་ཆོ་ག་བཞིན་བྱའོ། །ཞེས་པདྨ་དཀར་པོས་གསལ་རྗེ་བླ་མ་སྐལ་བཟང་དབང་པོས་ཡུན་རིང་པོ་ནས་བསྐུལ་བས་རྡོ་རྗེ་གླིང་དུ་ཡི་གེར་བཏབ་སྟེ། གྲུབ་པའི་རྒྱལ་མོ་ཉིད་ཀྱི་བྱིན་རླབས་ཀྱི་མཐུ་ཐོབ་པས་ཚད་མར་ཡང་འགྱུར་རོ། །བཀྲ་ཤིས། དགེའོ།། །།

